De littera G SHOW APPARATUS
| 264 | Inter Grates et gratias. Grates Deo aguntur, gratiae vero hominibus, quoniam referri possunt. Idcirco optime Deo convenit, quod relationem significat ad latriam. |
| 265 | Inter Gaudium et laetitiam. Stoici sic distinguunt: gaudium quippe esse aiunt elationem animi, in his quae digna sunt exsultantis, laetitiam vero effrenatam animi elationem, quae modum nesciat; et in his quoque quae vitio sunt mista laetetur. Unde et Scriptura: Non est gaudium impiis, dicit Dominus. |
| 266 | Inter Gravitatem et gravitudinem. Gravitas ex pondere animi, et ex sententia constat, gravitudo autem corporis est. Inter Grave et gravidum. Grave de natura dicitur; gravidum de accidenti fecunditate, ut arbor gravida pomis. |
| 267 | Inter Garrire et loqui. Loquitur qui recte et temperanter dicit; garrit qui aut multa verba dicit, aut sordide loquitur. |
| 268 | Inter Gerere et ferre. Gerimus nostra, et veluti natura aliqua, quae in nobis sunt, ferimus vero imposita nobis, veluti onus. Sed Virgilius permiste utitur (I Aeneid.): Fidus quae tela gerebat Achates. Gerebat pro ferre posuit. |
| 269 | Inter Gravatur et ingravatur Ingravatur pondere alieno, gravatur suo. |
| 270 | Inter Gentem et gentes, et genus. Gens nationis est, ut Graeciae, Assyriae. Hinc et gentilitas dicitur. Gentes autem familiae, ut Iuliae, Claudiae. Genus vero ad qualitatem refertur, ut pecoris, pomi. |
| 271 | Inter Graecum, Graecanicum, et Graecense. Graecus homo dicitur; Graecanica res; Graecense, quale in Graecia solet fieri. |
| 272 | Inter Gallum et Gallicum, et Gallicanum. Gallum in Gallia natum, Gallicum ex Gallia latum, Gallicanum, quod aliquid ex Gallia affert. |
| 273 | Inter Germanam et sororem. Soror enim ab eodem germine, non ab eodem utero; germana vero ex utriusque manans germine. |
| 274 | Inter Genitorem et patrem. Genitor naturae vocabulum est, sive originis; nam pater dignitatis et honoris nomen est. Unde et sanctos viros ac seniores patres dicimus. Genitores vero nostri a quibus nati sumus. |
| 275 | Inter Generat et parturit. Generare masculos dicimus, parturire feminas. Ut puta: Ille generavit, illa parturiit. |
| 276 | Inter Gubernatorem et nautam. Quod omnis gubernator, nauta esse potest, omnis nauta gubernator esse non potest. |
| 277 | Inter Grande et maximum. Grande ad corpus pertinet, maximum ad animum. |